Од 10 до 13 јуни 2025 година, координаторите на Мрежата за Родово Одговорно Буџетирање (МРОБ) се собраа во Кишињев, Молдавија, со цел да ја зајакнат регионалната координација во областа на застапувањето и комуникацијата низ Западен Балкан и Молдавија.
За време на средбата, ја разгледавме и унапредивме Комуникациската стратегија на МРОБ за да обезбедиме нејзино целосно усогласување со проектната документација, Стратегијата за развој на Мрежата и Планот за застапување. Клучни резултати од работните сесии беа: усогласување на стратегијата за кампањата PEFA, финализирање на Планот за застапување во областа на транспортот, преглед на севкупниот План за застапување и започнување на процесот на собирање приказни за влијание од нашите подгрантисти и други членки на мрежата. Овие приказни ќе го прикажат реалното влијание од нашата работа и ќе ја зајакнат базата на докази за промени.
Еден од тековните приоритети во нашите напори е промовирање на инклузивни, транспарентни и климатски одговорни политики за буџетирање и транспорт. За да ја нагласиме нашата заложба за одржлива мобилност и родово инклузивни јавни политики, нашиот тим симболично возеше велосипед покрај мирните брегови на езерото Валеа Морилор во Кишињев – покажувајќи ја нашата посветеност на одржлив и инклузивен транспортен систем што одговара на потребите на сите.
Обединета од заедничка цел, нашата мрежа продолжува да ги засилува своите напори за родово одговорното буџетирање (РОБ) да стане неразделен дел од системите за управување со јавните финансии.
